ليه يا شيخ كل واحد فينا أو أغلبنا لازم يكون عنده قصة مع الغدر أو الخيانة من ناس بتكون عملت فيها شئ كويس و مكنتش مستني رد لكن ياريت مخدتش رد الجميل وبس لأ كمان اترد غدر و خيانة

برغم أن ديننا اعتقد أمرنا باللين و السهولة في التعامل والجدعنة و كل شئ جميل 
انا بس عاوز ارتاح واعرف هل احنا صح ولا غلط 
هل الواحد يتغير ويبقى قاسي 
هل لو أنا “صاحب شغل” لازم اقسي علي الموظفين و اتكبر عليهم و متساهلش معاهم في خصومات وابقي زي ما بيقولوا كده جاحد في الشغل 
هل لو حد صعب عليها هيفقرني فعلا زي مابيقولوا 
هل لو لقيت حد في زنقة مساعدوش لأنه هيتنطط عليا اول واحد اول ما يفوق من الزنقه عشان هيبقى عاوز يقضي على ماضيه اللي بيذكره بالزنقة و الفقر

هل لو دخلت في مشكله لازم اوريك العين الحمره واشتم واضرب و اهدد واعمل نمره عشان لو معملتش كده و فضلت اني أحل بالعقل واتغاضي عن جزء من حقي في سبيل اني ابقي حليم و كاظم الغيظ زي ماربنا امرني ولا هلاقي باقي الناس بتستهتر بيا والاقي المشاكل بتجيلي من كل حته عشان بقيت في نظرهم سهل و هتيه ومش هيشوفوها انها رقي واحترام

هل يا شيخنا لو لقيت حد مثلا معندوش خبره في حاجه و قلت اعمل خير و أشغله معايا و رزقي و رزقه على الله واتحملته وممكن تحملي ده يكون اذاني و خسرني فلوس لكن مهمنيش كل ده و راهنت عليه ومسكته شغلي و مش مستني رد غير انه يراعي ربنا في شغلي هل لما أكبره في الشغل هلاقي اللي انا عاوزه ولا هيتنطط عليا و شيطانه يهيأ له أنه سبب اللي انا فيه لو ناجح او هو متصور اني نجحت

هل لو كنت موظف وربنا انعم عليا بنعمة الأمانة و الالتزام في الشغل هل هلاقي منك كمدير احساس باللي انا بعمله في صمت ولا لازم اصيح طول اليوم و احسسك اني بعمل اللي مبيتعملش عشان تحس بأهميتي

هل يا فضيلة الشيخ لو انت صاحبي وأنا عمري ماحسبتها معاك لما كان حالي افضل من حالك ولما الدنيا تدور و يبقي حالك افضل لو احتجتك هلاقيك مبتحسبهاش معايا زي ماعملت ولا هلاقيك اخر حد ييجي في بالي اني اطلب منه يقف معايا في حالي !

طب قولي ياشيخنا لو انا ماشي ع الطريق بليل و شوفت حد واقف عطلان هل لو وقفت اساعده هلاقي منه استحسان و شكر ولا هيثبتني و ممكن كمان يقتلني و اي حد يسمع قصتي هيقول فعلا يا ولاد اللي يصعب عليك ي ق ت ل ك

طيب يا شيخ لو عندي بنت و اختارتلها ابن الحلال مش ابن الذوات و يسرت علي مسلم الزواج الحلال و مطلبتش ١٠٠ ناقه حمر هشوف منه رد في بنتي ولا هيقول عليها رخيصه و يطلع عينها

مفيش حد مننا يا شيخ إلا وله قصة مع الطيبة والتسامح والتواضع أو الجدعنه أو اللاين أو الحاجات الجميلة اللي بنحلم أننا نتعامل بيها زي ما بنعامل بيها إلا و كان ردها غدر و خيانه و تكبر و قلة تقدير

ولأول مره أكتب مقال و تحاور فيه نفسي و الشيخ اللي جوايا و عشان انا نفسي وأنا الشيخ ملقتش رد مقنع.